A cewar rahoton Kamfanin Dillancin Labaran Hauza, Hujjatul Islam Wal Muslimin Majid Talkhabi, Shugaban Cibiyar Koyar da Fiqhu ta Jami'ar Al-Mustafa, ya bayyana haka ne a wajen taron godiya da sabunta mubaya'a da ɗaliban Al-Mustafa suka yi wa Jagoran Musulmin duniya, Ayatullah Sayyid Mujtaba Khamene'i (Allah Ya tsawaita rayuwarsa), wanda aka gudanar yau Laraba a birnin Qum tare da halartar malamai da ɗalibai 'yan ƙasashen waje na wannan cibiya.
Ya yi nuni da dogon tarihi na gwagwarmayar tsakanin ɓangaren gaskiya da na ƙarya, yana mai cewa mushrikai da munafukai ba su samu damar cimma mugayen manufofinsu ba a zamanin Manzon Allah (SAWA), saboda haka suka sanya rai cewa za su cimma waɗannan manufofi bayan wafatin Annabi (SAWA).
Ya ƙara da cewa a zamanin Imamai Ma'asumai (AS) ma wannan gwagwarmaya ta ci gaba, amma masu kare addini irin su Sayyida Zahra (SA) da sauran masu wayar da kai sun rushe makircin ɓangaren ƙarya tare da rufe musu hanyoyin kutsawa.
Shaiɗanun wannan zamani suna jiran samun kafa a cikin sahun muminai
Shugaban Cibiyar Koyar da Fiqhu ta Jami'ar Al-Mustafa ya ce a halin yanzu al'umma tana cikin wani mataki mai matuƙar muhimmanci a tarihi, kuma shaiɗanun wannan zamani suna jiran wata kafa da za su samu a cikin sahun muminai. Sai dai ya ce, da albarkar Jagoranmu na yanzu, Ayatullah Sayyid Mujtaba Khamene'i, ba za su samu wannan dama ba, kuma ba za su iya cimma mugayen manufofinsu ba.
Hujjatul Islam Wal-Muslimin Talkhabi ya kuma yi ishara da irin ƙaunar da marigayi Allama Misbah Yazdi yake yi wa Imam Shahid, yana mai cewa furucinsa sananne cewa: "Ya dace mutum ya shafe dare da rana yana sujada don gode wa ni'imar jagoranci."
Wannan magana, a cewarsa, tana nuna muhimmancin ni'imar Wilaya a fahimta da tafarkin Allama Misbah Yazdi.
Imam Shahid ne ya tarbiyyantar da Jagoranmu
Ya bayyana cewa ɗaya daga cikin fitattun siffofin Imam Shahid shi ne tarbiyyantar da Jagoran juyin juya hali na yanzu. Ya ce ko da yake manufarsa ita ce tarbiyyantar da malami mai jihadi, amma wannan tarbiyya ta kai wani matsayi mai girma har Majalisar Kwarrarrun Jagoranci (Majlis-e Khobregan) ba ta ga wani da ya fi cancanta da wannan matsayi mai nauyi ba face shi.
Shugaban Cibiyar ya ci gaba da cewa Jagoranmu yana da matuƙar kula da martaba da matsayin Imam Shahid. Ya ce shi da kansa ya ji daga Sayyid Mujtaba cewa wani lokaci yana son isar da wani muhimmin saƙo ga Imam, amma saboda yana ganin lokacinsa mallakin miliyoyin mutane ne, sai ya yi taka-tsantsan, yana ganin lokacin da Imam yake yin alwala ne ya fi dacewa da isar da saƙon.
Sadaukarwar Jagora
Ya ƙara da cewa Jagoran ya ƙi amincewa da shawarwarin da aka ba shi na shiga cikin Majalisar r Malamai (Jami'ah Mudarrisin) da kuma Majalisar Kwarrarrun Jagoranci, domin gudun haifar da wata magana ko hayaniya da za ta shafi Imam Shahid. A kowane mataki yana kiyaye martaba da matsayin Wilaya. Haka kuma Imam Shahid ma yana girmama ɗansa Sayyid Mujtaba tare da kare mutuncinsa.
Bin diddigin wasiƙun da ba a san masu su ba
Hujjatul Islam Talkhabi ya ce sau da dama ya ga ana isar wa Sayyid Mujtaba wasiƙun buƙatu daga mutanen da ba su bayyana sunayensu ba. Daga baya kuma ya ji daga jami'ai daban-daban cewa Jagoran yana bin diddigin waɗannan wasiƙu daban-daban domin tabbatar da cewa haƙƙin mai wasiƙar bai salwanta ba.
Labarin Shahid Sayyid Hassan Nasrullah da amincewar Imam Shahid
Ya ce lokacin shirya wani muhimmin taron malaman Qum, sun so a samu saƙon bidiyo daga marigayi Shahid Sayyid Hassan Nasrullah. Sun ga cewa hanya mafi dacewa ita ce ta hanyar Sayyid Mujtaba. Bayan sun gabatar masa da buƙatar, sai ya isar da ita ga wani amintaccen ɗan ƙasar Lebanon wanda ya je wajen Imam Shahid, kuma a gaban Imam Shahidi aka gabatar da batun.
Ya ce Imam Shahid ya furta cikin sanyin murya cewa: "Yana da kyau."
Bayan ɗan lokaci kaɗan sai aka samu saƙon bidiyon Sayyid Hassan Nasrullah kuma aka yi amfani da shi a taron.
Daga baya, a cewarsa, Sayyid Mujtaba ya ba su labarin cewa lokacin da Shahid Sayyid Hassan Nasrullah ya ji cewa Jagora ya amince da wannan aiki da kalmar "Yana da kyau", nan take ya ce wa abokan aikinsa: "Duk aikin da Jagorana ya yarda da shi kuma ya ga yana da kyau, zan gaggauta aiwatar da shi."
Kuma cikin ɗan ƙanƙanin lokaci ya aiko musu da saƙon bidiyon.
Aikin da ya saɓa da abin da jagoran al'umma ya yarda da shi ba ya da albarka
A ƙarshen jawabinsa, memban kwamitin koyarwa na Jami'ar Al-Mustafa ya sake jaddada cewa biyayya ta zuciya ga Waliyyul Faƙih kuma Jagoran Musulmi tana sanya albarka a cikin aikin mutum.
Ya ce: "Duk aikin da, bisa ƙa'ida, ya saɓa da ra'ayin Waliyyin Allah ba ya da albarka. Amma idan wani aiki ko wani mataki ya samu yardar Waliyyin zamani, babu shakka yana tare da albarka."
Ya ƙara da cewa wannan wata fitacciyar siffa ce ta Shahid Sayyid Hassan Nasrullah, wanda kamar yadda marigayi Ayatullah Misbah Yazdi ya bayyana, ya kasance mai cikakkiyar biyayya ga Wilaya, kuma wannan ya kamata ya zama darasi ga mu ɗaliban addini.
Ra'ayinka